Gal 5 | MED | STEP | Kraist ndi, tᵾn kan ila pilinga ndurum uⱡ ei ndi, akup tᵾn wei mormun. Enim uⱡ ei pilik ronduⱡ mundᵾk muⱡᵾi! Jura wamp nga etmin uⱡ mbᵾ ndi, enim kindmant indi nᵾndangga mon!

Galatians 5

Kraist Ndi, Tᵾn Etpa Wei Mundrum Ei Mel Muⱡmin

1 Kraist ndi, tᵾn kan ila pilinga ndurum uⱡ ei ndi, akup tᵾn wei mormun. Enim uⱡ ei pilik ronduⱡ mundᵾk muⱡᵾi! Jura wamp nga etmin uⱡ mbᵾ ndi, enim kindmant indi nᵾndangga mon!

2 Na Pol ndi, ik nᵾnt ei pilᵾiya! Enim kᵾng kupti uⱡ ila, ruk puk uⱡ ti eng ndam, Kraist ei, enim nga mel ingk ti mon. 3 Aldpa ronduⱡ mundᵾp nᵾnt ei, wu nam ti kᵾng kupti uⱡ ila pilpa kelpa em ndam, mi ik puⱡ petᵾm kᵾⱡ kump kᵾm pep romba. 4 Enim wu mat mi ik ei, pep rok, Got kᵾn kun muⱡmin nᵾk enmin mbᵾ, Kraist kᵾn oi kan pendinmin. Wamp mbᵾ ndi, Got nga pol ti uⱡ ila, paⱡa ekit orunga mormin. 5 Wote, tᵾn Got nga Muⱡnga Wingti tᵾn nga mondpa pili orunga kongun enmin uⱡ ei ndi, tᵾn etpa Got kᵾn kun mondᵾmba nimbun nokundᵾnmᵾn. 6 Wote, tᵾn Kraist Jisas kᵾn rᵾp rop mormun uⱡ ei, kᵾng kupti uⱡ ei in kep, mon kep, uⱡ ⱡawa ti mon. Mondpa pili uⱡ ei ndi, wamp numan ngui uⱡ ei, ama kupa.

7 Enim unt molk kai mondrung. Nam ndi, enim kunt kan etpa tilinga, ik kupa ei wak ronmin? 8 Got enim wi ropa rukᵾr titim wu ei ndi, enim kunt kan iti nᵾtᵾtᵾm mon! 9 “Yis mel wei kᵾralt ndi, ruk puⱡnga, bret ei aupa oⱡa orum,” nᵾtᵾmin ni. 10 Na Nuim ei kᵾn, ronduⱡ mundᵾp pᵾnt ei mel ku, enim i ku etᵾk piling. Wamp nam ti, enim tᵾpa tiki pondᵾnum ei, Got elim ndi, punt ropa ngumba. 11 Kᵾng kupti uⱡ ei ndi, wamp etpa titim nilmba ndam, wamp mbᵾ ndi, na mbun mindil kit mat ngui nganggᵾⱡᵾngina, wote na mbun mindil ngunmin. Ei nambuⱡ emel, na Kraist nga nde peta kᵾⱡ nga ik nᵾndᵾt ei nga enmin. 12 Kᵾng kupti uⱡ ei, enim iteing nᵾk mbo rondᵾnmin wamp kᵾⱡ, en enim nga kᵾng ei, koptᵾk tᵾk, ekit nduⱡungina ndam, kapⱡa elinga.

13 Kupa angmᵾn, enim Jura wamp mbᵾ nga uⱡ etmin ila, wi ropa rᵾk rung tᵾpa wei mundrum. Wei mul uⱡ ei ndi, enim uⱡ ⱡawa iteing ni nandᵾtᵾm mon. Wote, uⱡ ei ndi, wamp numan nguk, ei nga wamp ti nga mana orunga molk, kongun wamp mel muⱡeing nᵾtᵾm. 14 Mi ik petᵾm mbᵾ, kump kum ik tenda ei ndi, tᵾpa rak ndurum, “Nim ndi, ninim numan ngurun ei mel, wamp wei mbᵾ i etkᵾn, numan ngui!” 15 Wote, enim nga ruk ting ila wamp ti kᵾn, ik mura tᵾk, el manda mendᵾk, popᵾⱡ mondᵾk uⱡ mbᵾ eng ndam, tᵾk muⱡᵾi! Tᵾk mindi namᵾndᵾk noⱡᵾn ndam, enim pora kit muⱡing.

Muⱡnga Wingti Nga Numan Ei Kᵾn, Wamp Nga Numan Ei Kᵾn

16 Na nᵾnt uⱡ mbᵾ ei mel, Muⱡnga Wingti ei ndi, numan orunga tᵾpa kun mundangga, wote wamp nga numan ila uⱡ etmᵾn nimbᵾ, wak rᵾmᵾn. 17 Tᵾn wamp nga numan ngurum uⱡ mbᵾ ndi, Muⱡnga ei tᵾpa pei mundrᵾm. Wote Muⱡnga ei ndi, numan ngurmin uⱡ mbᵾ ndi, wamp nga numan ei tᵾpa pei mundrum. Mel raⱡ el rui wamp ralk mormbil ei ndi, enim nga itmin nᵾk pᵾtmin uⱡ kᵾⱡ kapⱡa iti nᵾting. 18 Wote, Muⱡnga Wingti ei kᵾn, teng ndukᵾn, pep run ndam, nim mi ik ei nga mana orunga muⱡi nᵾmbᵾⱡᵾn. 19 Wamp nga numan ngurmᵾn uⱡ mbᵾ, mot nangga kᵾning. Ei, wapra rui uⱡ, uⱡ ⱡar mul, uⱡ kit iti uⱡ, kur atinga rui uⱡ, kupna ᵾmbᵾⱡi uⱡ, el rui wamp molk, el etᵾk, wᵾlᵾk rok, kandpa kum pindi uⱡ mbᵾ etᵾk, manga rapa oi kan pendᵾk, numan kit pilik, nu ronduⱡ nok, kinan kit mbᵾ nᵾk, wote uⱡ elpa elpa mbᵾ mel etmin. Na enim unt man ik ngur ni mel aldpa nᵾnt. Wamp uⱡ ei mel, i enmin wamp mbᵾ, Got nga wamp tᵾpa mumuk rui uⱡ ei, kandᵾk ti nᵾting mon.

22 Wote, Muⱡnga Wingti ei nga uⱡ kai mbᵾ mbo rondrum ei mel, wamp numan ngui uⱡ, numan kai pili uⱡ, numan wang ndui uⱡ, pilpa ment ndui uⱡ, popᵾⱡ mundi nᵾmᵾndi uⱡ, wamp mbᵾ kᵾn uⱡ, kai mbᵾ iti uⱡ, mok rui uⱡ, ik teng ndui uⱡ, wote numan orunga mepa mana pi uⱡ mbᵾ, Muⱡnga ei ndi etᵾm. Mi ik ti ndi, uⱡ kᵾⱡ mon ni nandᵾtᵾm. 24 Kraist Jisas kᵾn mormin wamp mbᵾ, kᵾng orunga numan kit pilik, uⱡ kit etmin mbᵾ pora, kambilik mana nduk on etmin. 25 Muⱡnga ei ndi, tᵾn kont mul uⱡ ei ngurum. Ei ndi ku, tᵾn nga mul uⱡ orunga tᵾpa kun mundrum. 26 Tᵾn nga kᵾng orunga mep oⱡa pi napᵾpᵾn. Wote, wamp mat kᵾn, ik nimbun popᵾⱡ kundi nᵾkᵾndᵾm, wᵾlᵾk rui narᵾpᵾn itᵾmin.